ഹോക്കി ലോകകപ്പ്: ജർമനിക്ക് കിരീടം

ഭുവനേശ്വർ: തുടർച്ചയായ രണ്ടാം മത്സരത്തിലും തിരിച്ചുവരവിന്റെ മായാജാലം പുറത്തെടുത്ത ജർമനിക്ക് ഹോക്കി ലോകകപ്പിൽ മൂന്നാം കിരീടം. ആവേശകരമായ ഫൈനലിൽ നിലവിലെ ജേതാക്കളായ ബെൽജിയത്തെ ഷൂട്ടൗട്ടിൽ 5-4ന് മറികടന്നായിരുന്നു ജർമൻ വിജയം.

നിശ്ചിത സമയത്ത് സ്കോർ 3-3 ആയിരുന്നു. ആദ്യ ക്വാർട്ടറിൽ രണ്ടു ഗോളിന് പിന്നിട്ടുനിന്ന ശേഷമായിരുന്നു ജർമൻ തിരിച്ചുവരവ്. സെമിയിൽ ആസ്ട്രേലിയക്കെതിരെ അവിശ്വസനീയ തിരിച്ചുവരവ് കാഴ്ചവെച്ച ജർമൻകാർ ഫൈനലിലും അതാവർത്തിച്ചു. ആസ്ട്രേലിയയെ 3-1ന് തോൽപിച്ച നെതർലൻഡ്സ് മൂന്നാം സ്ഥാനം കരസ്ഥമാക്കി.