ഒന്നും ശരിയായില്ല; ​​ഫ്രാങ്ക്​ ലാംപാർഡിനെ ചെൽസി പുറത്താക്കി

ലണ്ടൻ: ഇംഗ്ലീഷ്​ പ്രീമിയർ ലീഗിലെ നിരന്തര തിരിച്ചടികൾക്ക്​ പിന്നാലെ കോച്ച്​ ഫ്രാങ്ക്​ ലാംപാർഡി​െന ചെൽസി പുറത്താക്കി. 18 മാസം മുമ്പാണ്​ ചെൽസിയുടെ മുഖ്യ പരിശീലകനായി ലാംപാർഡ്​ എത്തിയത്​. പ്രീമിയർ ലീഗിൽ കഴിഞ്ഞ എട്ടുമത്സരങ്ങളിൽ അഞ്ചിലും പരാജയപ്പെട്ടതാണ്​ ലാംപാർഡിന്​ പുറത്തേക്കുള്ള​ വഴിയൊരുക്കിയത്​​. പി.എസ്​.ജിയുടെ മുൻ കോച്ച്​ തോസ്​ ടകലാകും ചെൽസി​യുടെ പുതിയ പരിശീലകൻ.

കഴിഞ്ഞ സീസണിൽ ആദ്യ നാലിലിടം പിടിച്ച ചെൽസി കിരീടം ലക്ഷ്യമിട്ടാണ് പുതുസീസൺ ​ തുടങ്ങിയത്​. ഇതിനായി 220 മില്യൺ യൂറോയോളം ചിലവിട്ട്​ തിമോ വെർണർ, കായ്​ ഹാവർട്ട്​സ്​ അടക്കമുള്ള വൻതാരങ്ങളെയും ടീമിലെത്തിച്ചു. പക്ഷേ ഒന്നും ശരിയായില്ല. 19 മത്സരങ്ങളിൽ നിന്നും എട്ടുജയവും ആറുതോൽവിയും അഞ്ചുസമനിലയുമടക്കം 9ാം സ്ഥാനത്താണ്​ ചെൽസിയിപ്പോൾ. ഇന്നലെ എഫ്​.എ കപ്പിൽ ല്യൂട്ടൺ ടൗണിനെതിരെ നടന്ന മത്സരത്തിൽ 3-1ന്​ വിജയിച്ചെങ്കിലും ലാംപാർഡി​നെ പുറത്താക്കാനുള്ള തീരുമാനത്തിൽ നിന്നും ചെൽസി പിന്മാറിയില്ല.

ചെൽസിയുടെ ഇതിഹാസ താരങ്ങളിലൊരാളായ ഫ്രാങ്ക്​ ലാംപാർഡ്​ 429 മത്സരങ്ങളിൽ ​ടീമിനായി പന്തുതട്ടിയിട്ടുണ്ട്​. 147 ഗോളുകൾ നേടിയ ലാംപാർഡ്​ ചെൽസിക്കൊപ്പം പ്രീമിയർ ലീഗ്​ കിരീടവും ചാമ്പൻസ്​ ലീഗ്​ കിരീടവും ചൂടിയിട്ടുണ്ട്​.