ഹൈബ്രിഡ് കഞ്ചാവുമായി സുഹൃത്തുക്കളായ യുവതിയും യുവാവും പിടിയില്‍; ബി.എം.ഡബ്ല്യു കാർ കസ്റ്റഡിയിൽ
text_fields
മാനന്തവാടി: ഹൈബ്രിഡ് കഞ്ചാവുമായി കണ്ണൂര്‍ സ്വദേശികളായ യുവാവും യുവതിയും പിടിയിലായി. സുഹൃത്തുക്കളായ കണ്ണൂർ അഞ്ചാംപീടിക കീരിരകത്ത് വീട്ടില്‍ കെ. ഫസല്‍ (24), തളിപറമ്പ് സുഗീതം വീട്ടില്‍ കെ. ഷിന്‍സിത (23) എന്നിവരെയാണ് വെള്ളമുണ്ട പൊലീസ് പിടികൂടിയത്.
ഇവരില്‍ നിന്ന് 20.80 ഗ്രാം ഹൈബ്രിഡ് കഞ്ചാവ് പിടിച്ചെടുത്തു. ഇവര്‍ സഞ്ചരിച്ച ബി.എം.ഡബ്ല്യു കാറും 96,290 രൂപയും മൊബൈൽ ഫോണുകളും കസ്റ്റഡിയിലെടുത്തു. വെള്ളമുണ്ട മൊതക്കര ചെമ്പ്രത്താംപൊയില്‍ ജങ്ഷനില്‍ വാഹനപരിശോധനക്കിടെയാണ് ഇവര്‍ വലയിലായത്. കാറിന്‍റെ ഡിക്കിയില്‍ ഒളിപ്പിച്ച നിലയിൽ രണ്ടു കവറുകളിലായാണ് കഞ്ചാവ് കണ്ടെത്തിയത്. ഉപയോഗത്തിനും വില്‍പനക്കുമായി ബംഗളൂരുവില്‍ നിന്ന് വാങ്ങിയതാണെന്ന് ഇവര്‍ പൊലീസിനോട് പറഞ്ഞു.
വെള്ളമുണ്ട എസ്.എച്ച്.ഒ ടി.കെ. മിനിമോള്‍, എസ്.ഐമാരായ എം.കെ. സാദിർ, ജോജോ ജോര്‍ജ്, എ.എസ്.ഐ സിഡിയ ഐസക്, എസ്.സി.പി.ഒ ഷംസുദ്ദീൻ, സി.പി.ഒമാരായ അജ്മൽ, നൗഷാദ്, അനസ് സച്ചിന്‍ ജോസ്, ദിലീപ്, അഭിനന്ദ്, സുവാസ്, ഷിബിന്‍, വാഹിദ് എന്നിവരാണ് പൊലീസ് സംഘത്തിലുണ്ടായിരുന്നത്.