‘കേരള സ്​റ്റോറി’ പ്രദർശിപ്പിക്കാൻ സഭക്ക്​ സ്വാതന്ത്ര്യമുണ്ട്, ഏത് സ്വീകരിക്കണമെന്ന് ജനങ്ങൾക്കറിയാം​ -ചാണ്ടി ഉമ്മൻ

തൃശൂർ: വിവാദ സിനിമയായ ‘കേരള സ്റ്റോറി’ ഇടുക്കി രൂപത പ്രദർശിപ്പിച്ചതിൽ പ്രതികരണവുമായി ചാണ്ടി ഉമ്മൻ എം​.എൽ.എ. കേരള സ്റ്റോറി പ്രദർശിപ്പിക്കാൻ സഭക്ക്​ സ്വാതന്ത്ര്യമുണ്ടെന്നും​ എന്നാൽ, ഏത് സ്വീകരിക്കണമെന്ന് ജനങ്ങൾക്ക്​ അറിയാമെന്നും അദ്ദേഹം തൃശൂരിൽ മാധ്യമ പ്രവർത്തകരോട്​ പറഞ്ഞു. ​യു.ഡി.എഫ്​ സ്ഥാനാർഥി കെ. മുരളീധരന്‍റെ തെരഞ്ഞെടുപ്പ്​ പ്രചാരണത്തിന്​ എത്തിയതായിരുന്നു ചാണ്ടി ഉമ്മൻ.

തൃശൂർ എടുക്കുന്നത്​ കെ. മുരളീധരൻ ആയിരിക്കും. തൃശൂർ എടുക്കുമെന്ന സുരേഷ് ഗോപിയുടെ പ്രഖ്യാപനം ആഗ്രഹം മാത്രമാണ്​. ഓരോരുത്തരും അങ്ങനെ പലതും ആഗ്രഹിക്കും, അത് നടപ്പാകണമെന്നില്ല. തൃശൂരിൽ മത്സരം ആരൊക്കെ തമ്മിലായാലും ജയിക്കുന്നത്​ മുരളീധരൻ ആയിരിക്കും. താൻ ബി.ജെ.പിയിലേക്ക് പോകുമെന്ന അഭ്യൂഹം പരത്തുന്നവർ അതിൽ ആനന്ദം കണ്ടെത്തട്ടെ. ജീവനുള്ള കാലം കോൺഗ്രസുകാരനായി തുടരും. പിതാവ് കാണിച്ചുതന്ന പാതയിലൂടെ സഞ്ചരിക്കുമെന്നും ചാണ്ടി ഉമ്മൻ പറഞ്ഞു.