യുവജന കമീഷൻ: ചിന്തക്ക് പകരം ഷാജർ വരുന്നു

തിരുവനന്തപുരം: സംസ്ഥാന യുവജന കമീഷൻ അധ്യക്ഷനായി ഡി.വൈ.എഫ്.ഐ കേന്ദ്ര കമ്മിറ്റി അംഗം എം. ഷാജറിനെ നിയമിക്കും. നിലവിലെ അധ്യക്ഷ ചിന്ത ജെറോമിന്‍റെ കാലാവധി കഴിയുന്ന സാഹചര്യത്തിലാണിത്. ഡി.വൈ.എഫ്.ഐ കേന്ദ്ര കമ്മിറ്റി അംഗം കൂടിയായ ചിന്ത രണ്ട് ടേം ഈ സ്ഥാനത്ത് പൂർത്തിയാക്കിയിട്ടുണ്ട്. 2016ൽ യുവജന കമീഷൻ അധ്യക്ഷയായ ചിന്ത ജെറോമിന് പിന്നീട് കാലാവധി നീട്ടി നൽകിയിരുന്നു.

ഇത് കഴിഞ്ഞ ഫെബ്രുവരിയിൽ പൂർത്തിയായി. പുതിയ അധ്യക്ഷൻ വരുന്നതുവരെയോ ആറു മാസത്തേക്കോ ആണ് ഇപ്പോൾ തുടരുന്നത്. ഷാജർ സി.പി.എം കണ്ണൂർ ജില്ല കമ്മിറ്റി അംഗവും ഡി.വൈ.എഫ്.ഐ മുൻ ജില്ല സെക്രട്ടറിയുമാണ്.