മുറ്റത്തെ ഷെഡിൽ നിന്നെടുത്ത കാറിടിച്ച് കുട്ടികൾ കിണറ്റിൽ വീണു; അദ്ഭുതം ഈ രക്ഷപ്പെടൽ

കൂരാലി (പൊൻകുന്നം): വീട്ടുമുറ്റത്തെ ഷെഡിൽ നിന്നെടുത്ത കാർ നിയന്ത്രണം വിട്ട് സമീപത്തെ കിണറി​െൻറ ഭിത്തിയിടിച്ചു തകർത്തു. കിണർവക്കത്തിരുന്ന രണ്ടുകുട്ടികൾ കിണറ്റിലേക്ക് വീണു.

പനമറ്റം ഇലവനാൽ മുഹമ്മദ് ഷബീർ തിങ്കളാഴ്ച രാവിലെ എട്ടിന് വീട്ടുമുറ്റത്തെ ഷെഡിൽനിന്ന് കാർ പുറത്തേക്കിറക്കവേ അബദ്ധത്തിൽ അമിതവേഗത്തിൽ നീങ്ങുകയായിരുന്നു. ഭിത്തി തകർത്ത കാർ കിണറി​െൻറ വക്കിൽ തങ്ങി നിന്നു. ഈ സമയം ഷബീറി​െൻറ മകൾ ഷിഫാന (14), ഷബീറി​െൻറ അനുജൻ സത്താറി​െൻറ മകൻ മുഫസിൻ (നാലര) എന്നിവർ ഇരുമ്പുവലയിട്ട കിണറി​െൻറ ഭിത്തിയിൽ ഇരിക്കുകയായിരുന്നു.

32 അടി ആഴമുള്ള കിണറിൽ എട്ടടിയോളം വെള്ളമുണ്ടായിരുന്നു. കാറി​െൻറ വലതുവശത്തെ മുൻചക്രം കിണറി​െൻറ നടുവിലായി താഴേക്ക്​ പതിക്കാതെ തട്ടി നിന്നു. ശബ്​ദം കേട്ട് ഓടിയെത്തിയ മുഹമ്മദ് ഷബീറി​െൻറ ജ്യേഷ്ഠൻ ഇ.ജെ. സക്കീർ ഹുസൈൻ മൗലവി കിണറ്റിലേക്ക് ഇറങ്ങി കുട്ടികളെ വെള്ളത്തിൽനിന്ന് ഉയർത്തിനിർത്തി. ഇതിനിടെ ഡ്രൈവിങ് സീറ്റിലുണ്ടായിരുന്ന ഷബീർ ഇടതുവശത്തെ വാതിലിലൂടെ സുരക്ഷിതമായി പുറത്തിറങ്ങി.

തുടർന്ന്​ കസേര കെട്ടിയിറക്കി ഷിഫാനയെ കരയിലെത്തിച്ചു. സക്കീർ ഹുസൈനെയും മുഫസിനെയും കാഞ്ഞിരപ്പള്ളിയിൽ നിന്നെത്തിയ ഫയർഫോഴ്‌സ് യൂനിറ്റ് വലയിൽ കയറ്റിയാണ് കരയിലെത്തിച്ചത്. കുട്ടികളെ കാഞ്ഞിരപ്പള്ളി ജനറൽ ആശുപത്രിയിലെത്തിച്ച് പരിശോധന നടത്തിയെങ്കിലും പരിക്കുകളില്ലാത്തതിനാൽ വിട്ടയച്ചു. രക്ഷാപ്രവർത്തനം നടത്തിയ സക്കീർ ഹുസൈൻ മൗലവി കാഞ്ഞിരപ്പള്ളി ബസ് സ്​റ്റാൻഡ് പള്ളിയിലെ ഇമാമാണ്.