അതിജീവന പോരാട്ടത്തിൽ വഴിയോര കച്ചവടക്കാരനായി മുഹമ്മദാലി മുസ്​ലിയാർ

ദേശമംഗലം: കോവിഡിനെ തുടർന്ന്​ ജീവിതം വഴിമുട്ടിയ കറ്റുവട്ടൂർ കള്ളിവളപ്പിൽ മുഹമ്മദാലി മുസ്​ലിയാർ (47) എന്ന അലി ഉസ്താദ് അതിജീവന പോരാട്ടത്തിലാണ്​. പുതുശ്ശേരിയിൽ വഴിയോരത്ത് അത്തറും സെൻറും മോതിരക്കല്ലുകളും മാസ്ക്കും വിറ്റാണ് ജീവിതം മുന്നോട്ട്​ കൊണ്ടുപോകുന്നത്​​.

21ാം വയസ്സ്​ മുതൽ 26 വർഷമായി മദ്​റസ അധ്യാപകനാണ്​ ഇദ്ദേഹം. കോവിഡിനെ തുടർന്ന് തൊഴിൽ ഇല്ലാതായതോടെയാണ്​​ വഴിയോര വിൽപനയിലേക്ക്​ തിരിഞ്ഞത്​. ചില കൂട്ടുകാർ തുക നൽകി സഹായിച്ചു. വെള്ളിയാഴ്ച ദിവസങ്ങളിൽ മുസ്​ലിം പള്ളിക്ക് മുന്നിലും കച്ചവടം ചെയ്യുന്നുമുണ്ട്​. കോഴിക്കോട്, തിരൂർ, മമ്പുറം സ്ഥലങ്ങളിൽനിന്നാണ് അത്തറുകൾ കൊണ്ടുവരുന്നത്. 50 മുതൽ 100 രൂപ വരെയാണ് ഒരു ചെറിയ കുപ്പി അത്തറിന് ഈടാക്കുന്നത്.