കറുകച്ചാലിൽ നിരീക്ഷണകാമറ പദ്ധതിയുമായി ജില്ല പഞ്ചായത്ത്

കറുകച്ചാൽ: മൂന്നുവർഷം മുമ്പ് നടപ്പാകാതെപോയ നിരീക്ഷണകാമറ പദ്ധതിയുമായി വീണ്ടും ജില്ല പഞ്ചായത്ത്. അത്യാധുനിക രീതിയിലുള്ള ആറ് നിരീക്ഷണ കാമറകൾ പുതുതായി സ്ഥാപിക്കാനാണ് തീരുമാനം. കറുകച്ചാൽ കേന്ദ്രീകരിച്ച് വാഴൂർ റോഡിലും മണിമല റോഡിലും മല്ലപ്പള്ളി റോഡിലുമായിരിക്കും പുതിയ കാമറകൾ സ്ഥാപിക്കുന്നത്.

നെത്തല്ലൂർ കവലയിൽ കോട്ടയം റോഡിലും വാഴൂർ റോഡിലും കറുകച്ചാലിൽനിന്നുള്ള റോഡിലും കാമറകൾ സ്ഥാപിക്കും. പ്രധാന റോഡുകളിൽനിന്ന് വരുന്ന വാഹനങ്ങൾ നിരീക്ഷിക്കുകയാണ് ലക്ഷ്യം.

പകൽപോലെ രാത്രിയിലും വ്യക്തമായ ദൃശ്യങ്ങൾ പകർത്താൻ 24 മണിക്കൂറും പ്രവർത്തിക്കുന്ന കാമറകൾക്ക് കഴിയും. പൊലീസ് സ്‌റ്റേഷനിൽ സ്ഥാപിക്കുന്ന മുറിയിലെ സ്‌ക്രീനുകളിലൂടെയാകും നിരീക്ഷണം.