സർവെ സംഘം മടങ്ങിയെത്തി; ജനം വീണ്ടും തിരിച്ചയച്ചു

കോഴിക്കോട്​: കെ.റെയിൽ വിരുദ്ധസമരം ശക്​തമായതിനെ തുടർന്ന്​ പള്ളിക്കണ്ടി കുണ്ടുങ്ങൽ മേഖലയിൽ നിന്ന്​ മടങ്ങിയ സർവെ സംഘം തിരിച്ചെത്തി. ജനവാസ മേഖലയിൽ പ്രതിഷേധം കനത്തു.

ഗൾഫിൽ ഭർത്താവു മരിച്ച സ്ത്രീയുടെ വീട്ടിൽ ഗേറ്റ്​ ചാടിക്കടന്ന് ഉദ്യോഗസ്ഥർ കല്ലിട്ടു. ഇത്​ ജനങ്ങൾ തടഞ്ഞു. ഉദ്യോഗസ്ഥരും ജനങ്ങളുമായി കൊമ്പുകോർത്തു. പ്രതിഷേധം കനത്തതോടെ ഉദ്യോഗസ്ഥർക്ക് വീണ്ടും​ മടങ്ങേണ്ടി വന്നു. ഉച്ചക്ക്​ 2.30 ഓടെയാണ്​ ഉദ്യോഗസ്ഥർ കൂടുതൽ പൊലീസ്​ സന്നാഹത്തോടെ എത്തിയത്​.

നിർത്തിവെച്ചു എന്ന്​ പറഞ്ഞ്​ മടങ്ങിയ ഉദ്യോഗസ്ഥർ ജനങ്ങളെ കബളിപ്പിച്ച്​ വീണ്ടും കല്ലുമായി വന്നതോടെ ജനങ്ങളുടെ രോഷം ഇരട്ടിയായി. ജനകീയ സമരത്തിന്​ മുന്നിൽ പൊലീസിനും സർവെ സംഘത്തിനും വീണ്ടും മടങ്ങേണ്ടി വന്നു. ഉദ്യോഗസ്ഥർ മടങ്ങിയ ശേഷം വീട്ടുമുറ്റത്ത്​ സ്ഥാപിച്ച കല്ല്​ നാട്ടുകാർ പിഴുതെറിഞ്ഞു.ഇതോടെ തിങ്കളാഴ്ച കോഴിക്കോട്ട്​ സ്ഥപിച്ച മുഴുവൻ കല്ലും ജനം പിഴുതെറിഞ്ഞു. ഇതിനിടെ കെ.റെയിൽ ഉദ്യേഗസ്ഥയോട്​ ജനങ്ങൾ മോശമായി പെരുമാറി എന്ന പരാതി ഉയർന്നു.

കുണ്ടുങ്ങലിൽ കെ റെയിൽ കുറ്റികൾ ജനങ്ങൾ പിഴുതെറിഞ്ഞിരുന്നു. ശക്​തമായ ജനകീയ സമരത്തിന്​ മുന്നിൽ നടപടികൾ തുടരാനാവാത്തതിനെ തുടർന്നായിരുന്നു തഹസിൽദാറുടെ നേതൃത്വത്തിലുള്ള ഉദ്യോഗസ്ഥസംഘം​ മടങ്ങിയത്.

പല തവണ പൊലീസും ജനങ്ങളും തമ്മിൽ ഉന്തുംതള്ളുമുണ്ടായി. പൊലിസ്​ സംരക്ഷണയിൽ കുറ്റിയിൽ മാർക്ക്​ ചെയ്യാൻ കൊണ്ട​ുവന്ന മഞ്ഞപ്പെയിന്‍റ് ജനങ്ങൾ റോഡിൽ ചിന്തി. രാവിലെ പത്ത്​ മുതൽ ഒരുമണിവരെ പൊരിവെയിലിൽ ജനം ​പ്രതിരോധം തീർത്തു.

അസി. കമീഷണർ ബിജുരാജിന്‍റെ നേതൃത്വത്തിൽ വൻ പൊലീസ്​ സംഘത്തിന്‍റെ സാന്നിധ്യത്തിലായിരുന്നു തിങ്കളാഴ്ച രാവിലെ കല്ലിടൽ ആരംഭിച്ചത്​. കുണ്ടുങ്ങലിലെ സർക്കാർ ഭൂമിയിൽ ആദ്യം കല്ലിട്ടപ്പോൾ ജനം എതിർത്തില്ല. 11 മണിയോടെ കെ. റെയിൽ സമരനേതാവ്​ ടി.ടി. ഇസ്മായിൽ, ഡി.സി.സി പ്രസിഡന്‍റ്​ അഡ്വ. കെ. പ്രവീൺകുമാർ, മുസ്​ലീം ലീഗ്​ ജില്ലാ വൈസ്​ പ്രസിഡന്‍റ്​ കെ. മൊയ്തീൻകോയ, ബി.ജെ.പി ജില്ല പ്രസിഡന്‍റ്​ വി.കെ. സജീവൻ, യുവമോർച്ച നേതാവ്​ പ്രകാശ്​ബാബു തുടങ്ങിയവരുടെ നേതൃത്വത്തിൽ സമരം ശക്​തമാക്കി.

റവന്യു ഭൂമിയിൽ സ്ഥാപിച്ച മൂന്നു കല്ലുകളും പിഴുതെറിഞ്ഞു. തഹസിൽദാർ തിരിച്ചുപോവണമെന്നാവശ്യപ്പെട്ട്​ പലതവണ ജനങ്ങൾ മുദ്രാവാക്യം വിളിച്ചു. പൊലീസ്​ സംയമനം പാലിച്ചു.