കേന്ദ്രത്തിനെതിരെ പോരാട്ടം കടുപ്പിക്കാൻ ഇന്‍ഡ്യ സഖ്യം; തിങ്കളാഴ്ച ഡൽഹിയിൽ വൻ പ്രതിഷേധമെന്ന് കെ.സി വേണുഗോപാൽ

ആലപ്പുഴ: മുഖ്യ തെരഞ്ഞെടുപ്പ് കമീഷണറുടെ രാജി ആവശ്യപ്പെട്ട് ജന്തർമന്തറിൽ സി.ജെ.പി നടത്തുന്ന പ്രതിഷേധത്തിനിടെ കേന്ദ്ര സർക്കാറിനെതിരെ പോരാട്ടം കടുപ്പിക്കാനൊരുങ്ങി ഇന്‍ഡ്യ സഖ്യം. വോട്ടവകാശ സംരക്ഷണവും തെരഞ്ഞെടുപ്പ് പ്രക്രിയയിലെ സുതാര്യതയും ഉയർത്തിപ്പിടിച്ച് തിങ്കളാഴ്ച ഡൽഹിയിൽ വൻ പ്രതിഷേധം സംഘടിപ്പിക്കുമെന്ന് കോൺഗ്രസ് ജനറൽ സെക്രട്ടറി കെ.സി. വേണുഗോപാൽ അറിയിച്ചു. തെരഞ്ഞെടുപ്പ് കമീഷന്റെ പ്രവർത്തനങ്ങളിലെ ആശങ്കകളും കേരളത്തോടുള്ള കേന്ദ്രത്തിന്റെ അവഗണനയും ചൂണ്ടിക്കാട്ടിയ അദ്ദേഹം, പ്രധാനമന്ത്രി നരേന്ദ്ര മോദിക്കും ആഭ്യന്തരമന്ത്രി അമിത് ഷാക്കുമെതിരെ രൂക്ഷ വിമർശനവും ഉന്നയിച്ചു. ആലപ്പുഴയിൽ മാധ്യമങ്ങളോട് സംസാരിക്കവെയാണ് കെ.സി വേണുഗോപാലിന്‍റെ പ്രഖ്യാപനം.

ഗ്യാനേഷ് കുമാറിനെ സംരക്ഷിക്കാനാണ് പ്രധാനമന്ത്രിയും ആഭ്യന്തരമന്ത്രിയും ശ്രമിക്കുന്നതെന്ന് വേണുഗോപാൽ ആരോപിച്ചു. അവരുടെ നടപടികൾ ഒടുവിൽ രാഷ്ട്രീയ തകർച്ചയിലേക്ക് നയിക്കുമെന്നും അദ്ദേഹം കൂട്ടിച്ചേർത്തു. അതേ സമയം രാഷ്ട്രീയ തകർച്ചയിലേക്ക് അടുക്കുന്ന നേതാവിനെപ്പോലെയാണ് പ്രധാനമന്ത്രി മോദി പെരുമാറുന്നതെന്നും പ്രതിപക്ഷത്തിന്റെ പ്രതിഷേധങ്ങളെ അദ്ദേഹം ഭയപ്പെടുന്നുവെന്നും വേണുഗോപാൽ അറിയിച്ചു. പ്രതിഷേധക്കാരെ നേരിടുന്നതിനായി മെട്രോ സ്റ്റേഷനുകൾ അടച്ചിടുന്നതുൾപ്പെടെയുള്ള പൊലീസ് നടപടികളുടെ പശ്ചാത്തലത്തിലാണ് വേണുഗോപാലിന്‍റെ പ്രതികരണം. രാജ്യത്തെ തെരഞ്ഞെടുപ്പ് പ്രക്രിയ സ്വതന്ത്രവും നീതിപൂർവവുമാകുന്നതുവരെ കോൺഗ്രസും ഇന്ത്യ സഖ്യവും പോരാട്ടം തുടരുമെന്നും വേണുഗോപാൽ വ്യക്തമാക്കി.

കേരളത്തിലെ എസ്.ഐ.ആർ നടപടികൾക്കെതിരെ കോൺഗ്രസ് ജാഗ്രതയോടെയാണ് നിലപാടെടുത്തതെന്ന് വേണുഗോപാൽ അറിയിച്ചു. തെരഞ്ഞെടുപ്പ് കമീഷന്റെ ലെറ്റർഹെഡിൽ ബി.ജെ.പിയുടെ തെരഞ്ഞെടുപ്പ് ചിഹ്നം പ്രത്യക്ഷപ്പെട്ടതുമായി ബന്ധപ്പെട്ട വിവാദവും അദ്ദേഹം ചൂണ്ടിക്കാട്ടി. ഇന്ത്യയിലെ തെരഞ്ഞെടുപ്പ് സംവിധാനത്തിന്റെ പ്രവർത്തനത്തെക്കുറിച്ചുള്ള പ്രതിപക്ഷത്തിന്റെ ആശങ്കകളാണ് ഈ വിഷയങ്ങൾ ഉന്നയിക്കുന്നതിലൂടെ വ്യക്തമാക്കുന്നതെന്നും അദ്ദേഹം പറഞ്ഞു.