വെള്ളക്കെട്ടിലെ ഒഴുക്കില്‍പ്പെട്ട് അഞ്ച് വയസുകാരി മരിച്ചു

വൈത്തിരി: അച്​ഛനും അമ്മക്കുമൊപ്പം തോട് മുറിച്ച് കടക്കവെ വെള്ളക്കെട്ടിലെ ഒഴുക്കില്‍പ്പെട്ട് അഞ്ച് വയസുകാരി മരിച്ചു. പൊഴുതന അച്ചൂര്‍ വേങ്ങാത്തോട് കാട്ടുനായ്ക്ക കോളനിയിലെ ഉണ്ണികൃഷ്ണന്‍-രതി ദമ്പതികളുടെ മകള്‍ ഉണ്ണിമായ (അഞ്ച്​) ആണ് മരിച്ചത്.

ബുധനാഴ്​ച ഉച്ചയോടെയാണ് സംഭവം. വെങ്ങാത്തോട് നാലാം നമ്പർ കൈതക്കൊല്ലി തോട്ടിൽ വീണാണ് അപകടം സംഭവിച്ചത്. മാതാപിതാക്കൾക്കൊപ്പം കുടുംബ വീട്ടിലേക്ക്​ പോവുന്നതിനിടയിൽ തോട്ടിലേക്ക്​ കാൽ വഴുതി വീഴുകയായിരുന്നു.

ഒഴുക്കില്‍പ്പെട്ട കുട്ടിയെ നാട്ടുകാര്‍ പൊഴുതന പ്രാഥമികാരോഗ്യ കേന്ദ്രത്തില്‍ എത്തിച്ചൂവെങ്കിലും മരിക്കുകയായിരുന്നു. മൃതദേഹം പോസ്​റ്റ്​മോര്‍ട്ടത്തിനായി വൈത്തിരി താലൂക്ക് ആശുപത്രിയിലേക്ക് മാറ്റി.