ബംഗാൾ ഉൾക്കടലിൽ ന്യൂനമർദ സാധ്യത; അഞ്ചു ദിവസം ഇടിമിന്നലോട് കൂടിയ മഴക്ക്​ സാധ്യത

തിരുവനന്തപുരം: തെക്കുകിഴക്കൻ അറബിക്കടലിനും മധ്യ കിഴക്കൻ അറബിക്കടലിനും മുകളിലായി സ്ഥിതിചെയ്യുന്ന ന്യൂനമർദം ശനിയാഴ്ചയോടെ തീവ്ര ന്യൂനമർദമായി മാറാൻ സാധ്യതയെന്ന് കേന്ദ്ര കാലാവസ്ഥ വകുപ്പ്. ഇതുമൂലം സംസ്ഥാനത്ത്​ അടുത്ത അഞ്ചു ദിവസം ഇടിമിന്നലോടുകൂടിയ മിത​മോ ഇടത്തരമോ ആയ മഴക്ക്​ സാധ്യതയുണ്ട്​.

മലയോര മേഖലകളിൽ പ്രത്യേക ജാഗ്രത പുലർത്തണം. വ്യാഴാഴ്ച കേരള തീരത്തും ലക്ഷദ്വീപ് പ്രദേശത്തും മത്സ്യബന്ധനത്തിന് പോകാന്‍ പാടില്ലെന്ന ജാഗ്രത നിര്‍ദേശം പുറത്തിറക്കി​.

വെള്ളിയാഴ്ച തെക്കന്‍ അറബിക്കടലിന്റെ മധ്യഭാഗങ്ങള്‍, അതിനോട് ചേര്‍ന്ന മധ്യ അറബിക്കടല്‍ എന്നിവിടങ്ങളില്‍ മണിക്കൂറില്‍ 45 മുതല്‍ 55 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 65 കിലോമീറ്റര്‍ വരെയും വേഗത്തില്‍ ശക്തമായ കാറ്റിനും മോശം കാലാവസ്ഥക്കും സാധ്യതയുണ്ട്​.