ബസ് ജീവനക്കാരനെ കുത്തിപ്പരിക്കേൽപ്പിച്ച യാത്രക്കാരൻ അറസ്​റ്റിൽ

പത്തിരിപ്പാല: സ്വകാര്യബസ് ജീവനക്കാരനെ കുത്തിപ്പരിക്കേൽപ്പിച്ച ബസ് യാത്രക്കാരൻ അറസ്​റ്റിൽ. കണ്ണമ്പ്ര കാരപറ്റ പടിഞ്ഞാറുമുറി സുജീഷിനെയാണ് (30) മങ്കര എസ്.ഐ പ്രകാശൻ അറസ്​റ്റ്​ ചെയ്തത്. കുത്തേറ്റ സ്വകാര്യബസ് ക്ലീനർ ചേലക്കര കുളപ്പാറകുന്ന് സുധീഷിനെ (32) കൈക്ക് സാരമായി പരിക്കേറ്റ്​ ഒറ്റപ്പാലം താലൂക്ക് ആശുപത്രിയിൽ പ്രവേശിപ്പിച്ചു. പാലക്കാട്-പത്തിരിപ്പാല-ഷൊർണൂർ റൂട്ടിൽ സർവിസ് നടത്തുന്ന ഫ്ലൈവെൽ ബസിലാണ് സംഭവം.

ബുധനാഴ്ച വൈകീട്ട് മേലാമുറിയിൽനിന്ന് പട്ടാമ്പിയിലേക്ക് പോകാൻ ബസിൽകയറിയ സുജീഷ്​ പട്ടാമ്പിയിലേക്ക് ടിക്കറ്റെടുത്തു. എന്നാൽ, കല്ലേക്കാട് നിർത്തി ഒരു സാധനം വാങ്ങാൻ സമയം തരണമെന്ന്​ പറഞ്ഞത്രേ. തുടർന്ന്, ഇയാളെ കല്ലേക്കാട് ഇറക്കി. എന്നാൽ, തിരിച്ചുവരാത്തതിനാൽ ബസ് പുറപ്പെട്ടു. ബസ് പറളി ചന്തപ്പുരക്ക് സമീപം എത്തിയപ്പോൾ പിറകെയെത്തിയ ഇയാൾ ബസിന് മുന്നിൽ ബൈക്ക് നിർത്തി തടഞ്ഞുനിർത്തി. തുടർന്ന്​, കത്തിയെടുത്ത്‌ ക്ലീനറെ കുത്തുകയായിരുന്നു.

പിറകിൽ വന്ന മറ്റൊരു ബസിൽ കയറി രക്ഷപ്പെട്ടു. 2015ൽ വടക്കഞ്ചേരിയിൽ സി.പി.എം പ്രവർത്തകനെ കൊലപ്പെടുത്തിയ കേസിൽ ഇയാൾ ഒന്നാംപ്രതിയാ​െണന്ന് പൊലീസ് പറഞ്ഞു. മറ്റ്​ രണ്ടുകേസിലും പ്രതിയാണ്​. കൊലപാതകകേസിൽ ജാമ്യം ലഭിച്ച് പുറത്തിറങ്ങിയതാണ്​. മങ്കര എസ്.ഐ പ്രകാശൻ, സ്പെഷൽ ബ്രാഞ്ച് എ.എസ്.ഐ മണികണ്ഠൻ എന്നിവരുടെ നേതൃത്വത്തിലാണ് അറസ്​റ്റ്​. കോടതിയിൽ ഹാജരാക്കി റിമാൻഡ് ചെയ്തു.