പ്രായത്തിനേക്കാൾ അനുഭവങ്ങളുടെ കരുത്തുമായി അരിത; കോൺഗ്രസിന്‍റെ പ്രായം കുറഞ്ഞ സ്​ഥാനാർഥി

തിരുവനന്തപുരം: കേരളത്തിൽ കോൺഗ്രസിന്‍റെ ചരിത്രത്തിലെ ഏറ്റവും പ്രായം കുറഞ്ഞ വനിതാ സ്ഥാനാർഥിയായി മാറിയിരിക്കുകയാണ് 27കാരിയായ​ അരിതാ ബാബു. കായംകുളം നിയമസഭ മണ്ഡലത്തിൽ യു. പ്രതിഭക്കെതിരെയാണ്​ യൂത്ത്​ കോൺഗ്രസ്​ സംസ്​ഥാന സെക്രട്ടറിയായ അരിത മത്സരിക്കുന്നത്​.

ശബരിമല, പൗരത്വ നിയമ സമര മുഖങ്ങളിൽ വീറോടെ നിറഞ്ഞു നിന്ന അരിത പശു തൊഴുത്തിലെ ജോലികൾ കഴിഞ്ഞ ശേഷമാണ്​ പൊതുപ്രവർത്തനത്തിനിറങ്ങുന്നത്​. ഇക്കാര്യം കെ.പി.സി.സി പ്രസിഡന്‍റ്​ മുല്ലപ്പള്ളി രാമചന്ദ്രൻ സ്​ഥാനാർഥി പ്രഖ്യാപന വേളയിൽ എടുത്തു പറഞ്ഞു.

പിതാവ്​ അസുഖബാധിതനായതോ​െടയാണ്​ പശുക്കളുടെ പരിപാലനം ഏറ്റെടുത്തത്​. പുലർച്ചെ എഴുന്നേറ്റ്​ സൊസൈറ്റിയിലും വീടുകളിലും പാൽ വിതരണം ചെയ്​ത ശേഷമാണ്​ അരിത ആലപ്പുഴ ജില്ലാ പഞ്ചായത്ത്​ അംഗമെന്ന നിലയിൽ പ്രവർത്തിച്ചിരുന്നത്​.

ഇക്കഴിഞ്ഞ തദ്ദേശ തെരഞ്ഞെടുപ്പിൽ സജീവമായി മത്സര രംഗത്ത്​ ഇല്ലാതിരുന്നിട്ടും പുന്നപ്ര ഡിവിഷനിൽ നിന്ന്​ ആയിരത്തോളം വോട്ടുകൾ അരിത സ്വന്തമാക്കിയിരുന്നു. 15 വർഷമായി സംഘടനാ പ്രവർത്തന രംഗത്തുള്ള സഹപ്രവർത്തകക്ക്​ വേണ്ടിയാണ്​ 2015ൽ താൻ വിജയിച്ച കൃഷ്​ണപുരം ഡിവിഷനിൽ നിന്ന്​ മാറിയത്​.

പിന്നാലെ പുന്നപ്ര ഡിവിഷനിൽ നിന്ന്​ നാമനിർദേശ പത്രിക സമർപിച്ചെങ്കിലും പിൻവലിക്കാൻ പാർട്ടി നിർദേശം നൽകി. എന്നാൽ പത്രിക പിൻവലിക്കാനുള്ള സമയം കഴിഞ്ഞതിനാൽ സാ​ങ്കേതികമായി മാത്രം സ്​ഥാനാർഥിയായി. എങ്കിലും അരിത 1000ത്തിലധികം വോട്ടുകൾ നേടി.

നേരത്തെ ജില്ലാ പഞ്ചായത്തിലേക്ക്​ വിജയിച്ച അരിത സ്വന്തം നാട്ടിൽ നിന്നും നിയമസഭയി​േലക്ക്​ ജയിച്ച്​ കയറാനാകുമെന്ന പ്രതീക്ഷയിലാണ്​. കായംകുളം സ്വദേശിയായ ഒരാൾ വർഷങ്ങൾക്ക്​ ശേഷമാണ്​ ഇവിടെ മത്സരക്കുന്നതെന്ന കാര്യം അവർക്ക്​ ആത്മവിശ്വാസം നൽകുന്നു.