കർണാടകയിൽ കർഷകനെ എടുത്തെറിഞ്ഞ് കാട്ടാന

മംഗളൂരു: ചിക്കമംഗളൂരു ജില്ലയിൽ അല്ലൂർ ഹുക്കുണ്ട ഗ്രാമത്തിന് സമീപം കാപ്പിത്തോട്ടത്തിൽ ഉറങ്ങുകയായിരുന്ന കർഷകനെ കാട്ടാന ആക്രമിച്ചു. കെ.നാരായൺ ഗൗഡയാണ്(51) ആക്രമണത്തിനിരയായത്. ഞായറാഴ്ച രാവിലെയാണ് സംഭവം.

ഉണക്കാനായി വിരിച്ച കാപ്പിക്കുരുവിന് കാവൽ നിന്ന ഗൗഡയെ ആന തുമ്പിക്കൈ കൊണ്ട് ഉയർത്തി വശത്തേക്ക് എറിയുകയായിരുന്നു.ചെന്നു വീണത് വൈക്കോൽ കൂമ്പാരത്തിലായതിനാൽ ഗുരുതര പരിക്കേൽക്കാതെ രക്ഷപ്പെട്ടു.നിസാര പരിക്കുകളേറ്റ കർഷകനെ ആശുപത്രിയിൽ പ്രവേശിപ്പിച്ചു.നാട്ടുകാർ വിവരമറിയിച്ചതനുസരിച്ച് വനം വകുപ്പ് അധികൃതർ സ്ഥലത്തെത്തി.