റവന്യൂ രേഖയിൽ പേര് മാറ്റിയാൽ ഭൂമിയുടെ ഉടമസ്ഥാവകാശം മാറില്ല; മധ്യപ്രദേശ് ഹൈക്കോടതിയുടെ ഉത്തരവ് റദ്ദാക്കി സുപ്രീം കോടതി

ന്യൂഡൽഹി: റവന്യൂ രേഖയിൽ പേരുമാറ്റം നടത്തിയതുകൊണ്ട് മാത്രം ഭൂമിയുടെ ഉടമസ്ഥാവകാശം ലഭിക്കുകയോ നഷ്ടപ്പെടുകയോ ചെയ്യില്ലെന്ന് സുപ്രീം കോടതി. റവന്യൂ രേഖയിലെ എൻട്രി മാത്രം അടിസ്ഥാനമാക്കി സ്വത്തിന്റെ ഉടമസ്ഥാവകാശം തീരുമാനിക്കാനാകില്ലെന്നും മറ്റ് രേഖകളും തെളിവുകളും കൂടി പരിശോധിച്ചാണ് അവകാശം നിർണയിക്കേണ്ടതെന്നും കോടതി വ്യക്തമാക്കി.

ജസ്റ്റിസുമാരായ സഞ്ജയ് കരോൾ, അഗസ്റ്റിൻ ജോർജ് മാസിഹ് എന്നിവരടങ്ങിയ ബെഞ്ചാണ് മധ്യപ്രദേശ് ഹൈക്കോടതിയുടെ ഉത്തരവ് റദ്ദാക്കിയത്. റവന്യൂ രേഖയിലെ എൻട്രി മുൻനിർത്തി സ്വത്തിന്റെ ഉടമസ്ഥാവകാശവുമായി ബന്ധപ്പെട്ട തർക്കത്തിൽ ഹൈക്കോടതി തീരുമാനമെടുത്ത സാഹചര്യത്തിലാണ് സുപ്രീം കോടതി ഇടപെടൽ.

രേഖയിൽ പേര് ഇല്ലാത്തതിന്റെ പേരിൽ ഒരാൾ സ്വത്തിൽ തനിക്കുള്ള അവകാശം സ്വമേധയാ ഉപേക്ഷിച്ചതായും കരുതാനാകില്ല. അവകാശം ഉപേക്ഷിച്ചുവെന്ന വാദം ഉന്നയിക്കുന്നവർ അത് സ്വതന്ത്രമായി തെളിയിക്കണമെന്നും ബെഞ്ച് പറഞ്ഞു.

റവന്യൂ രേഖയിലെ മ്യൂട്ടേഷൻ പ്രധാനമായും ഭൂനികുതി ഉൾപ്പെടെയുള്ള റവന്യൂ കാര്യങ്ങൾ കൈകാര്യം ചെയ്യുന്നതിനുള്ള ഭരണപരമായ നടപടിയാണ്. റവന്യൂ രേഖയിലെ വിവരങ്ങൾ മറ്റ് തെളിവുകൾക്കൊപ്പം വിലയിരുത്തേണ്ടതാണ്. അതിനാൽ റവന്യൂ എൻട്രിക്ക് മാത്രം മുൻതൂക്കം നൽകി ഉടമസ്ഥാവകാശം നിർണയിക്കാനാകില്ലെന്നും കോടതി ചൂണ്ടിക്കാട്ടി.

ഭൂമിയുടെ യഥാർഥ ഉടമസ്ഥാവകാശം സംബന്ധിച്ച തർക്കത്തിൽ അന്തിമ തീരുമാനം എടുക്കാനുള്ള അധികാരം സിവിൽ കോടതിക്കുണ്ടെന്നും സുപ്രീം കോടതി വ്യക്തമാക്കി. റവന്യൂ രേഖ ഉടമസ്ഥാവകാശത്തെ പിന്തുടരുന്നതാണെന്നും അതിന് പകരം ഉടമസ്ഥാവകാശം നിർണയിക്കുന്ന രേഖയായി അതിനെ കാണാനാകില്ലെന്നും ബെഞ്ച് വ്യക്തമാക്കി.

സ്വത്ത് തർക്കത്തിൽ നിയമപരമായ കാലപരിധിയായ ലിമിറ്റേഷൻ ആരംഭിക്കുന്ന തീയതിയും റവന്യൂ രേഖയിൽ പേരുമാറ്റം നടന്ന തീയതി മാത്രം അടിസ്ഥാനമാക്കി നിശ്ചയിക്കാനാകില്ലെന്നും സുപ്രീം കോടതി പറഞ്ഞു.