സർക്കാർ വാഹനങ്ങൾക്കിനി ആയുസ്സ് 15 വർഷം മാത്രം; 2022 ൽ പ്രാബല്യത്തിൽ വന്നേക്കും

ന്യൂഡൽഹി: റോഡ്​ ഗതാഗത, ഹൈവെ മന്ത്രാലയം സമർപ്പിച്ച നിർദേശം അംഗീകരിക്കപ്പെട്ടാൽ ഇനി മുതൽ 15 വർഷത്തിലധികം പഴക്കമുള്ള സർക്കാർ വാഹനങ്ങളുടെ രജിസ്​ട്രേഷൻ പുതുക്കാനാകില്ല. 2022 ഏപ്രിൽ ഒന്നുമുതൽ ഇത്​ പ്രാബല്യത്തിൽ വരുന്ന രൂപത്തിലാണ്​ കരടു നിർദേശമുള്ളത്​.

കേന്ദ്ര-സംസ്​ഥാന സർക്കാറുകളുടെയും കേന്ദ്ര ഭരണ പ്രദേശങ്ങളുടെയും പൊതുമേഖല സ്​ഥാപനങ്ങളുടെയും മുനിസിപ്പൽ-തദ്ദേശ സ്വയംഭരണ സ്​ഥാപനങ്ങളുടെയും വാഹനങ്ങൾക്ക്​ ഇതു​ ബാധകമാകും. 2021-22 വർഷത്തെ കേന്ദ്ര ബജറ്റിലെ 'പഴയ വാഹനങ്ങൾ ഒഴിവാക്കുന്ന നയ'ത്തി​‍െൻറ ഭാഗമായാണ്​ പുതിയ തീരുമാനം. പഴയ വാഹനങ്ങൾ പുതിയവയേക്കാൾ 12 മടങ്ങുവരെ മലിനീകരണത്തിന്​ കാരണമാകുന്നതായാണ്​ കണക്ക്​.

പുതിയ നിർദേശത്തിൽ മന്ത്രാലയം ബന്ധപ്പെട്ടവരുടെ അഭിപ്രായങ്ങളും നിർദേശങ്ങളും തേടിയിട്ടുണ്ട്​. ഇത്​ 30 ദിവസത്തിനകം സമർപ്പിക്കണം.