'കണ്ണിനുള്ളിലും ഹൃദയത്തിനടുത്തും വരെ തുളച്ചുകയറിയത് ഇരുന്നൂറോളം പെല്ലറ്റുകൾ'; സി.ജെ.പി സമരത്തിൽ പരിക്കേറ്റ വിദ്യാർഥിയുടെ എഫ്.ഐ.ആർ വിവരങ്ങൾ പുറത്ത്
text_fields
ന്യൂഡൽഹി: ജന്തർമന്തറിൽ വിദ്യാർഥി സമരത്തിനിടെയുണ്ടായ സംഘർഷത്തിൽ പെല്ലറ്റ് ഗൺ ആക്രമണത്തിനിരയായ ഡൽഹി യൂണിവേഴ്സിറ്റി വിദ്യാർഥി സാറിൽ ലോച്ചബിന്റെ പരാതിയിൽ പൊലീസ് എഫ്.ഐ.ആർ രജിസ്റ്റർ ചെയ്തു. കോൺഗ്രസ് നേതാവ് രാഹുൽ ഗാന്ധി വിദ്യാർഥിയോടൊപ്പം പാർലമെന്റ് സ്ട്രീറ്റ് പൊലീസ് സ്റ്റേഷന് മുന്നിൽ ആറിലധികം മണിക്കൂർ നീണ്ട സമരവും കുത്തിയിരിപ്പും നടത്തിയതിനെത്തുടർന്നാണ് പൊലീസ് നടപടി സ്വീകരിച്ചിരിക്കുന്നത്.
ലഭിച്ച വിവരങ്ങൾ അനുസരിച്ച് ഡൽഹി സർവകലാശാലയിലെ സ്കൂൾ ഓഫ് ഓപ്പൺ ലേണിങിലെ 19 കാരനായ വിദ്യാർഥിയാണ് സാറിൽ ലോച്ചബ്. നീറ്റ് ചോദ്യപേപ്പർ ചോർച്ചക്കും ഡൽഹി പൊലീസ് റിക്രൂട്ട്മെന്റ് പരീക്ഷയിലെ ക്രമക്കേടുകൾക്കുമെതിരെ ജൂലൈ 20-ന് നടന്ന പ്രതിഷേധത്തിനിടയിലാണ് സാറിലിന് ഗുരുതര പരിക്കേറ്റത്. പൊലീസിന്റെ ഭാഗത്തുനിന്നുണ്ടായ ലാത്തിച്ചാർജിലും കണ്ണീർവാതക പ്രയോഗത്തിലുമാണ് വിദ്യാർഥികൾ ചിതറിയോടിയത്. കയ്യിൽ ദേശീയ പതാകയുമായി ഓടുന്നതിനിടയിൽ തന്റെ മുഖത്തും കണ്ണിനും നെഞ്ചിലും പെല്ലറ്റുകൾ പതിക്കുകയായിരുന്നു എന്ന് സാറിൽ പരാതിയിൽ വ്യക്തമാക്കുന്നു.
നീല യൂണിഫോമിലുള്ള ഒരു ഉദ്യോഗസ്ഥൻ വലിയ റൈഫിൾ ഉപയോഗിച്ച് തനിക്ക് നേരെ വെടിയുതിർക്കുകയായിരുന്നു എന്ന് വിദ്യാർഥി പറയുന്നു. ശരീരത്തിൽ ഏകദേശം 200-ഓളം പെല്ലറ്റുകൾ തുളച്ചുകയറിയിട്ടുണ്ടെന്ന് സി.ടി സ്കാൻ റിപ്പോർട്ടിൽ വ്യക്തമായിട്ടുണ്ട്. വലതുകണ്ണിലെ പെല്ലറ്റുകൾ പൂർണ്ണമായി പുറത്തെടുക്കാൻ ഡോക്ടർമാർക്ക് കഴിഞ്ഞിട്ടില്ലെന്നും അത് ജീവനാന്ത്യം വരെ ശരീരത്തിൽ ഉണ്ടാകുമെന്നും അദ്ദേഹം വേദനയോടെ പറയുന്നു. കൂടാതെ ഹൃദയത്തിന് സമീപവും പെല്ലറ്റുകൾ തങ്ങിനിൽക്കുന്നുണ്ടെന്നും ദീർഘകാലത്തെ ചികിത്സ ആവശ്യമാണെന്നും ഡോക്ടർമാർ അറിയിച്ചു.
കഴിഞ്ഞ എട്ട് ദിവസമായി കോണാട്ട് പ്ലേസ്, സൻസദ് മാർഗ്, മന്ദിർ മാർഗ് പൊലീസ് സ്റ്റേഷനുകളിലും ക്രൈംബ്രാഞ്ച് ഓഫീസിലും കയറിയിറങ്ങിയിട്ടും പൊലീസ് തന്റെ പരാതി സ്വീകരിക്കാൻ തയാറായിരുന്നില്ല. ഒടുവിൽ രാഹുൽ ഗാന്ധിയുടെ ഇടപെടലിനെത്തുടർന്നാണ് നീതി ലഭിക്കാനുള്ള ആദ്യ പടിയായി എഫ്.ഐ.ആർ രജിസ്റ്റർ ചെയ്യപ്പെട്ടത്. ഭാരതീയ ന്യായ സംഹിതയിലെ (ബി.എൻ.എസ്) 118, 125 വകുപ്പുകൾ പ്രകാരമാണ് അപരിചിതരായ വ്യക്തികൾക്കെതിരെ കേസ് എടുത്തിരിക്കുന്നത്. സി.സി.ടി.വി ദൃശ്യങ്ങളും ഡ്രോൺ ഫൂട്ടേജുകളും സംരക്ഷിക്കണമെന്നാണ് ഈ വിദ്യാർഥിയുടെ ഇപ്പോഴത്തെ പ്രധാന ആവശ്യം.