ഡൽഹി വിമാനത്താവളത്തിൽ വെടിയുണ്ടകളുമായി അഭിഭാഷകൻ ഉൾപ്പെടെ രണ്ടു പേർ പിടിയിൽ

ന്യൂഡൽഹി: ഇന്ദിരാഗന്ധി അന്താരാഷ്​ട്ര വിമാനത്താവളത്തിൽ രണ്ട്​ യാത്രക്കാർ വെടിയുണ്ടകളുമായി പിടിയിലായി. ഗുഡ്​ഗാവ്​ മലിബു സ്വാദേശി മൊഹർ സിങ് യാദവ്​ ​(65), ഹരിയാനയിലെ സിർസ സ്വദേശി പൂനം വെർമ എന്നിവരാണ്​ പിടിയിലായത്​. ഇവർക്കെതിരെ ആയുധ നിയമത്തിലെ 25ാം വകുപ്പ്​ പ്രകാരം പൊലീസ്​ കേസെടുത്തു.

വെള്ളിയാഴ്​ചയായിരുന്നു​ സംഭവം. വിമനത്താവളത്തിലെ ടെർമിനൽ മൂന്നിൽ വെച്ച്​ നടന്ന പരിശോധനയിലാണ്​ മൊഹർസിങ്​ യാദവിൽ നിന്ന് 11 വെടിയുണ്ടകൾ കണ്ടെടുത്തത്​. ഗുഡ്​ഗാവ്​ കോടതിയിലെ അഭിഭാഷകനും വിരമിച്ച ചീഫ്​ പബ്ലിക്​ പ്രോസിക്യൂട്ടറുമായ മൊഹർ സിങ് ഇൻഡിഗോ വിമാനത്തിൽ​​ ഡൽഹിയിൽ നിന്ന്​ മാൽഡീവ്​സിലേക്ക്​ പോകാനൊരുങ്ങുകയായിരുന്നു. വെടിത്തിരകൾ ത​െൻറ ലൈസൻസുള്ള തോക്കി​േൻറതാണെന്ന്​ ചൂണ്ടിക്കാട്ടിയ ഇയാൾ ലൈസൻസ്​ കാണിക്കുകയും ചെയ്​തു. എന്നാൽ ലൈസൻസ്​ പ്രകാരം ഹരിയാന സംസ്ഥാനത്ത്​ മാത്രമേ അവ ഉപയോഗിക്കാനുള്ള അധികാരമുണ്ടായിരുന്നുള്ളൂ. തുടർന്ന്​ കേസെടുക്കുകയായിരുന്നു.

ബാഗേജ്​ പരിശോധനയിലാണ്​ പൂനം വെർമയിൽ നിന്ന്​ വെടിയുണ്ട കണ്ടെടുത്തത്​. ഇവർ ഡൽഹിയിൽ നിന്ന്​ ഗോവയിലേക്ക്​ പോകാനായി എത്തിയതായിരുന്നു. ഒരു വെടിയുണ്ടയാണ്​ ഇവരു​ടെ ബാഗിൽ നിന്ന്​ കണ്ടെടുത്തതെങ്കിലും ഇതി​ന്​ ആവശ്യമായ രേഖകൾ സമർപ്പിക്കാൻ അവർക്ക്​ സാധിക്കാത്തതിനാൽ പൊലീസ്​ കേസെടുക്കുകയായിരുന്നു.

ഇന്ദിരാഗാന്ധി വിമാനത്താവളത്തിൽ അശ്രദ്ധ മൂലമോ അറിവോടുകൂടിയോ യാത്രക്കാർ കൈവശം വെച്ച വെടിയുണ്ടകൾ പിടിക്കപ്പെട്ടതിനെ തുടർന്ന്​ ആയുധ നിയമപ്രകാരം ഈ വർഷം ഇതുവരെ 13 കേസുകളാണ്​ രജിസ്റ്റർ ചെയ്​തത്.​​ കഴിഞ്ഞ വർഷം ഇത്തരത്തിൽ 66 കേസുകൾ രജിസ്​റ്റർ ചെയ്​തിരുന്നു.