'ഗുജറാത്തിൽ ഹിന്ദുക്കൾ താമസിച്ചിരുന്നത്​ ബങ്കറുകളിൽ'; മുസ്​ലിം വിദ്വേഷ പ്രസംഗം നടത്തിയ ബി.ജെ.പി നേതാവിനെതിരേ ഗുണ്ടാ ആക്​ട്​

വിദ്വേഷ പ്രസംഗം നടത്തിയെന്ന കേസിൽ തമിഴ്​നാട്​ ബി.ജെ.പി നേതാവിനെതിരേ ഗുണ്ടാ ആക്​ട്​ ചുമത്തി. കോയമ്പത്തൂർ കളക്ടർ കെ രാജമണിയുടെ ഉത്തരവിനെത്തുടർന്ന് ബി.ജെ.പി സംസ്ഥാന പ്രവർത്തക സമിതി അംഗം ആർ .കല്യാണരാമനെ (54) ആണ്​ ഗുണ്ടാ നിയമപ്രകാരം അറസ്റ്റ്​ ചെയ്​തത്​. പൊതുസമൂഹത്തിന്‍റെ സമാധാനം കെടുത്തുംവിധത്തിലുള്ള പ്രവർത്തനങ്ങളിൽ ബിജെപി നേതാവ് ഏർപ്പെട്ടതായി വ്യാഴാഴ്ച പുറപ്പെടുവിച്ച ഉത്തരവിൽ പറയുന്നു.

ജനുവരി 31ന് കോയമ്പത്തൂരിനടുത്തുള്ള മേട്ടുപാളയത്തിൽ നടന്ന പൊതു റാലിയിലാണ്​ കല്യാണരാമൻ വിവാദ പരാമർശങ്ങൾ നടത്തിയത്​. 147 (കലാപം), 149 (നിയമവിരുദ്ധമായ അസംബ്ലി), 153 (എ) (കലാപമുണ്ടാക്കാനുള്ള ഉദ്ദേശ്യത്തോടെ പ്രകോപനം നൽകുന്നത്) തുടങ്ങിയ വകുപ്പുകൾ പ്രകാരമാണ്​ കേസെടുത്തത്​. ഇയാളെ പിന്നീട്​ ജുഡീഷ്യൽ കസ്റ്റഡിയിൽ വിട്ടു. ബുധനാഴ്ച കോയമ്പത്തൂർ ജില്ലാ പ്രിൻസിപ്പൽ ജില്ലാ സെഷൻസ് ജഡ്ജി ആർ ശക്തിവേൽ കല്യാണരാമന്‍റെ ജാമ്യാപേക്ഷ തള്ളി. നിലവിൽ സബ് ജയിലിൽ കഴിയുന്ന പ്രതിയെ പിന്നീട്​ കോയമ്പത്തൂർ സെൻട്രൽ ജയിലിലേക്ക് മാറ്റും.

ഗുജറാത്തിലെ ഹിന്ദുക്കൾക്ക് നേരത്തേ ഒളിച്ചിരിക്കാൻ ബങ്കറുകളുണ്ടായിരുന്നെന്നും ഗുജറാത്ത് കലാപത്തെത്തുടർന്നാണ്​ ഈ ഭയം ശമിച്ചതെന്നുമായിരുന്നു കല്യാണരാമന്‍റെ പ്രസംഗം. പ്രവാചകൻ മുഹമ്മദ് നബിയേയും പ്രസംഗത്തിൽ അപമാനിച്ചിരുന്നു. കല്യാണരാമൻ സംസാരിക്കുന്ന വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.