എൽ.കെ. അദ്വാനി വീണ്ടും ആശുപത്രിയിൽ

ന്യൂഡൽഹി: മുതിർന്ന ബി.ജെ.പി നേതാവ് എൽ.കെ. അദ്വാനിയെ വീണ്ടും ആശുപത്രിയിൽ പ്രവേശിപ്പിച്ചു. അപ്പോളോ ആശുപത്രിയിലെ ന്യൂറോളജി വിഭാഗത്തിലാണ് പ്രവേശിപ്പിച്ചത്.

96കാരനായ അദ്വാനിയെ ന്യൂറോളജി സീനിയർ കൺസൾട്ടന്‍റ് ഡോ. വിനിത് സൂരിയാണ് പരിശോധിക്കുന്നത്. ആരോഗ്യനില തൃപ്തികരമാണെന്നും ഡോക്ടർമാരുടെ നിരീക്ഷണത്തിലാണെന്നും ആശുപത്രി അധികൃതർ അറിയിച്ചു.

ജൂൺ 27ന് പ്രായാധിക്യത്താലുള്ള അസ്വസ്ഥതകളെ തുടർന്ന് ഡൽഹി ഓൾ ഇന്ത്യൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസ് (എയിംസ്) യൂറോളജി വിഭാഗത്തിൽ അദ്വാനിയെ പ്രവേശിപ്പിച്ചിരുന്നു.