ഇസ്​മായിലിന്​ കൂട്ട്​ നാട്ടുകാരൻ പൈലറ്റ്​

ദുബൈ: എയർ അറേബ്യയുടെ വിമാനത്തിൽ ഏക യാത്രക്കാരനായി ഷാർജയിൽ എത്തിയ കണ്ണൂർ സ്വദേശിയായ വ്യവസായി ഇസ്​മായിലിന്​ കൂട്ടായി വിമാനത്തിലുണ്ടായിരുന്നത്​ നാട്ടുകാരനായ പൈലറ്റ്​ ബിനു.

കോഴിക്കോടുനിന്ന്​ ഷാർജയിലേക്കായിരുന്നു അൽ മദീന ഗ്രൂപ്​​ ഡയറക്ടറും ദുബൈ കെ.എം.സി.സി സംസ്ഥന കമ്മിറ്റി ട്രഷററുമായ പി.കെ. ഇസ്മായിൽ പൊട്ടങ്കണ്ടി യാത്ര ചെയ്​തത്​. മാസങ്ങളായി നാട്ടിൽ കുടുങ്ങിയതിനാൽ കമ്പനിയുടെ ബോർഡ് മീറ്റിങ്ങിലും അടിയന്തര പ്രാധാന്യമുള്ള ഇടപാടുകളിലും പങ്കെടുക്കാൻ കഴിഞ്ഞിരുന്നില്ല.

ഗോൾഡൻ വിസക്കുള്ള നടപടിക്രമങ്ങൾ പൂർത്തീകരിച്ചിരുന്നുവെങ്കിലും നാട്ടിലായതിനാൽ വിസ സ്​റ്റാമ്പ് ചെയ്യാൻ സാധിച്ചിരുന്നില്ല. കമ്പനി സി.ഇ.ഒ അസീസ് പാലേരിയുടെ ശ്രമഫലമായി കോസ്മോ ട്രാവൽസ് മുഖേന പ്രത്യേക അനുമതി സംഘടിപ്പിച്ച്​ യാത്ര ചെയ്​തത്.

എയർപോർട്ടിലെത്തി ബോർഡിങ് പാസ് കിട്ടിയശേഷമാണ് താൻ മാത്രമേ യാത്രക്കാരനായുള്ളൂ എന്നറിഞ്ഞതെന്ന് ഇസ്മായിൽ പറഞ്ഞു. കണ്ണൂർ മട്ടന്നൂർ സ്വദേശി ബിനുവാണ് പൈലറ്റ് എന്നറിഞ്ഞതും വിമാനത്തിൽ കയറിയശേഷമാണ്​. ഈ മാസം മൂന്നിനാണ് യാത്രാനുമതി തേടി അപേക്ഷ നൽകിയത്. എണ്ണായിരം ദിർഹമാണ്​ യാത്ര ചെലവ്.