ഫോൺ ഓഫറുകൾക്കും സൗജന്യ കോളുകൾക്കും സൗദിയിൽ പുതിയ നിയന്ത്രണം വരുന്നു

റിയാദ്: സൗദി അറേബ്യയിലെ ടെലികോം കമ്പനികൾ ഉപഭോക്താക്കളിൽനിന്ന് ഈടാക്കുന്ന നിരക്കുകൾക്കും നൽകുന്ന ഓഫറുകൾക്കും കൂടുതൽ നിയന്ത്രണം കൊണ്ടുവരാൻ കമ്യൂണിക്കേഷൻസ്, സ്പേസ് ആൻഡ് ടെക്നോളജി കമ്മീഷൻ (സി.എസ്​.ടി) തീരുമാനിച്ചു. ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനും വിപണിയിൽ കൂടുതൽ സുതാര്യത വരുത്തുന്നതിനുമാണ് പുതിയ നിയമങ്ങൾ. പദ്ധതിയുടെ കരട് രൂപം പൊതുജനങ്ങളുടെ അഭിപ്രായങ്ങൾ അറിയുന്നതിനായി ‘ഇസ്തിത്​ലാ’ വെബ്‌സൈറ്റിൽ പ്രസിദ്ധീകരിച്ചിട്ടുണ്ട്.

പ്രധാന മാറ്റങ്ങൾ ഇവയാണ്​

• ചാരിറ്റി സ്ഥാപനങ്ങൾക്ക് ഫോൺ വഴി സംഭാവന നൽകുമ്പോൾ കമ്പനികൾ ഈടാക്കുന്ന സർവീസ് ചാർജിന് ഇനി നിശ്ചിത പരിധി ഉണ്ടായിരിക്കും. കൂടാതെ, ടോൾ ഫ്രീ നമ്പറുകളിലേക്ക് കോളുകൾ സ്വീകരിക്കുന്നതിനും കമ്പനികൾക്ക് പരമാവധി നിരക്ക് നിശ്ചയിക്കും.
• ടെലികോം കമ്പനികൾ പുതിയ ലോയൽറ്റി പ്രോഗ്രാമുകളോ ഓഫറുകളോ അവതരിപ്പിക്കുന്നതിന് മുൻപ് സി.എസ്.ടിയുടെ അനുമതി വാങ്ങണം. കാലാവധി തീർന്ന ഓഫറുകൾ അതോറിറ്റിയുടെ പ്രത്യേക അനുമതിയില്ലാതെ നീട്ടിക്കൊണ്ടുപോകാനോ പരസ്യം ചെയ്യാനോ പാടില്ല.
• അതോറിറ്റി അംഗീകരിച്ച നിരക്കിൽ കൂടുതൽ തുക ഉപഭോക്താക്കളിൽനിന്ന് ഈടാക്കാൻ കമ്പനികൾക്ക് അവകാശമുണ്ടായിരിക്കില്ല. ഡിജിറ്റൽ ഓഫറുകൾ, ഫിക്സഡ് വയർലെസ് ആക്സസ്, ലൊക്കേഷൻ മാറിയുള്ള ഇൻറർനെറ്റ് ഉപയോഗം എന്നിവയ്ക്കും പ്രത്യേക നിബന്ധനകൾ ബാധകമായിരിക്കും.