'ദൃശ്യം 3' നാളെ തിയറ്ററുകളിലേക്ക്...; ആഗോള അഡ്വാൻസ് ബുക്കിങ് വഴി മാത്രം സ്വന്തമാക്കിയത് 25 കോടി രൂപ!
text_fields
മലയാള സിനിമയിലെ എക്കാലത്തെയും വലിയ ജനപ്രിയ ഫ്രാഞ്ചൈസികളിലൊന്നായ 'ദൃശ്യം' അതിന്റെ മൂന്നാം ഭാഗവുമായി നാളെ തിയറ്ററുകളിലേക്ക് എത്തുകയാണ്. റിലീസിന് മുന്നോടിയായുള്ള ആഗോള അഡ്വാൻസ് ബുക്കിങിൽ തന്നെ വൻ കുതിപ്പാണ് ചിത്രം നടത്തിക്കൊണ്ടിരിക്കുന്നത്. ലോകമെമ്പാടുമുള്ള സിനിമാപ്രേമികൾക്കിടയിൽ ഈ ചിത്രത്തിനുള്ള വമ്പൻ ഹൈപ്പും കാത്തിരിപ്പും അടിവരയിടുന്നതാണ് ഇപ്പോൾ പുറത്തുവരുന്ന പ്രീ-സെയിൽസ് കണക്കുകൾ.
ആഗോള ബോക്സ് ഓഫീസിൽ നിന്ന് മാത്രം ചിത്രം ഇതിനകം തന്നെ 25 കോടി രൂപയുടെ അഡ്വാൻസ് ബുക്കിങ് കലക്ഷൻ നേടിക്കഴിഞ്ഞു. ആദ്യ വാരന്ത്യത്തോടെ ഇത് 27 കോടി രൂപയിലേക്ക് ഉയരുമെന്നാണ് വിലയിരുത്തലുകൾ. ഈ ആകെ തുകയിൽ 18 മുതൽ 19 കോടി രൂപ വരെ റിലീസ് ദിവസത്തെ മാത്രം ടിക്കറ്റ് വിൽപനയിലൂടെയാണ് സ്വന്തമാക്കിയിട്ടുള്ളത്. കേരളത്തിൽ നിന്ന് മാത്രം ആദ്യ ദിന പ്രീ-സെയിൽസ് വഴി 6 കോടിയിലധികം രൂപ ചിത്രം ഇതിനോടകം നേടിക്കഴിഞ്ഞു.
തിയറ്റർ റിലീസിന് ഇനി വളരെ കുറഞ്ഞ സമയം മാത്രം ബാക്കിനിൽക്കെ, അഡ്വാൻസ് ബുക്കിങിൽ വലിയൊരു മുന്നേറ്റം തന്നെയാണ് പ്രതീക്ഷിക്കുന്നത്. പ്രീമിയർ ഷോകൾ ആരംഭിക്കുന്നതിന് മുൻപ് തന്നെ ആകെ അഡ്വാൻസ് ബുക്കിങ് തുക 35 കോടിയോ അതിൽ കൂടുതലോ കടക്കുമെന്നാണ് ട്രേഡ് അനലിസ്റ്റുകളുടെ പ്രവചനം. ഇത് സംഭവിക്കുകയാണെങ്കിൽ, മലയാള സിനിമാ ചരിത്രത്തിൽ 'എൽ2: എമ്പുരാൻ' കഴിഞ്ഞാൽ ഏറ്റവും ഉയർന്ന പ്രീ-സെയിൽസ് നേടുന്ന ചിത്രമായി ദൃശ്യം 3 മാറും.
വർഷങ്ങൾക്ക് ശേഷം ജോർജുകുട്ടിയുടെ ജീവിതത്തിലെ ആ രഹസ്യങ്ങളുടെ ചുരുളഴിയുമ്പോൾ, സൂപ്പർസ്റ്റാർ മോഹൻലാൽ വീണ്ടും ആ ഐക്കോണിക് കഥാപാത്രമായി സ്ക്രീനിലെത്തുന്നു. അദ്ദേഹത്തോടൊപ്പം മീന, സിദ്ദിഖ്, ആശാ ശരത്, മുരളി ഗോപി, അൻസിബ ഹസൻ, എസ്തർ അനിൽ എന്നിവരും തങ്ങളുടെ മുൻ കഥാപാത്രങ്ങളെ അവതരിപ്പിക്കാൻ തിരിച്ചെത്തുന്നുണ്ട്. കൂടാതെ, കേസിന്റെ പിന്നിലെ യഥാർത്ഥ സത്യം പുറത്തുകൊണ്ടുവരാൻ ശ്രമിക്കുന്ന ഒരു പത്രപ്രവർത്തകയുടെ പുതിയ വേഷത്തിൽ നടി വീണ നന്ദകുമാറും ഈ ഭാഗത്തിൽ അണിനിരക്കുന്നുണ്ട്.
ജീത്തു ജോസഫ് രചനയും സംവിധാനവും നിർവഹിക്കുന്ന ദൃശ്യം 3, ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമിക്കുന്നത്. ചിത്രത്തിന് സംഗീതവും പശ്ചാത്തല സംഗീതവും ഒരുക്കിയിരിക്കുന്നത് അനിൽ ജോൺസണാണ്. സതീഷ് കുറുപ്പ് ഛായാഗ്രഹണവും വിനായക് വി.എസ് എഡിറ്റിങും നിർവഹിക്കുന്നു. മലയാളത്തിന് പുറമെ തെലുങ്ക്, കന്നഡ ഭാഷകളിലായി മെയ് 21-നാണ് ചിത്രം തിയറ്ററുകളിൽ പ്രദർശനത്തിന് എത്തുന്നത്.