സി.എസ്.ഐ.ആർ നെറ്റ് ഫലം പ്രസിദ്ധീകരിച്ചു

ന്യൂഡൽഹി: 2025 ഡിസംബർ സെഷനിലെ സി.എസ്.ഐ.ആർ യു.ജി.സി നെറ്റ് പരീക്ഷാ ഫലം നാഷനൽ ടെസ്റ്റിങ് ഏജൻസി പ്രസിദ്ധീകരിച്ചു. പരീക്ഷയെഴുതിയവർക്ക് തങ്ങളുടെ മാർക്ക്, പെർസെന്റൈൽ സ്കോർ എന്നിവ csirnet.nta.nic.in എന്ന ഔദ്യോഗിക വെബ്സൈറ്റിൽ നിന്ന് ഡൗൺലോഡ് ചെയ്യാം.

ജൂനിയർ റിസർച് ഫെലോഷിപ്, അസിസ്റ്റന്റ് പ്രഫസർ, പിഎച്ച്.ഡി പ്രവേശനം എന്നിവക്കായി ഏതാണ്ട് ഒന്നര ലക്ഷത്തിലധികം ഉദ്യോഗാർഥികളാണ് ഇത്തവണ പരീക്ഷയെഴുതിയത്. യോഗ്യത കട്ട് ഓഫ് മാർക്ക് ജനറൽ, ഒ.ബി.സി വിഭാഗങ്ങൾക്ക് കുറഞ്ഞത് 33 ശതമാനവും എസ്.സി, എസ്.ടി, ഭിന്നശേഷിക്കാർക്ക് 25 ശതമാനവുമാണ്.

ജനുവരി 30ന് പുറത്തിറക്കിയ അന്തിമ ഉത്തര സൂചിക പ്രകാരമാണ് ഫലം തയാറാക്കിയത്. ചില സാങ്കേതിക കാരണങ്ങളാൽ മൂന്ന് ചോദ്യങ്ങൾ ഒഴിവാക്കിയിട്ടുണ്ട്.