പോപ്‌കോൺ ഉൽപ്പാദനത്തിൽ ഇന്ത്യ സ്വയംപര്യാപ്തതയിലേക്ക്; 2030ഓടെ ഇറക്കുമതി പൂർണ്ണമായും ഒഴിവാക്കും
text_fields
ന്യൂഡൽഹി: പത്ത് വർഷം മുമ്പ് വരെ പോപ്‌കോണിനായി പൂർണ്ണമായും വിദേശരാജ്യങ്ങളെ ആശ്രയിച്ചിരുന്ന ഇന്ത്യ, 2030ഓടെ ഈ മേഖലയിൽ സ്വയംപര്യാപ്തത കൈവരിക്കാനൊരുങ്ങുന്നു. ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ച് (ICAR) ഡയറക്ടർ ജനറൽ ഡോ. എം.എൽ. ജാട്ടാണ് ഈ സുപ്രധാന നേട്ടത്തെക്കുറിച്ചുള്ള വിവരങ്ങൾ പുറത്തുവിട്ടത്. ഇറക്കുമതി കുറക്കുന്നതിലൂടെ ഏകദേശം 810 കോടി രൂപയുടെ വിദേശനാണ്യം രാജ്യത്തിന് ലാഭിക്കാൻ സാധിക്കും.
2014-15 കാലയളവിൽ വെറും 50,000 ടൺ ആയിരുന്ന ഉൽപ്പാദനം 2025-26ൽ 1.30 ലക്ഷം ടണ്ണായി വർധിച്ചു. 2030ഓടെ ഇത് 1.80 ലക്ഷം ടണ്ണിൽ എത്തുമെന്നാണ് പ്രതീക്ഷിക്കുന്നത്. നിലവിൽ രാജ്യത്തെ പോപ്‌കോൺ ആവശ്യകതയുടെ 70 ശതമാനവും ആഭ്യന്തര ഉൽപ്പാദനത്തിലൂടെയാണ് നിറവേറ്റുന്നത്. ലുധിയാന ആസ്ഥാനമായുള്ള ഐ.സി.എ.ആറിന്റെ (ICAR) ഇന്ത്യൻ ഇൻസ്റ്റിറ്റ്യൂട്ട് ഓഫ് മെയ്‌സ് റിസർച്ച് (IIMR), പ്രമുഖ സ്വകാര്യ കമ്പനിയായ ഗോർമെറ്റ് പോപ്‌കോണിക്ക (Gourmet Popcornica) എന്നിവർ തമ്മിലുള്ള സഹകരണമാണ് ഈ മാറ്റത്തിന് പിന്നിൽ.
2021 ഫെബ്രുവരിയിൽ വികസിപ്പിച്ചെടുത്ത 'LPCH 3' എന്ന തദ്ദേശീയ സങ്കരയിനം ചോളം കാർഷിക രംഗത്ത് വലിയ മാറ്റമാണ് ഉണ്ടാക്കിയത്. ഉയർന്ന വിളവ്, രോഗപ്രതിരോധ ശേഷി, മികച്ച ഗുണമേന്മ എന്നിവ ഇതിന്റെ പ്രത്യേകതകളാണ്. ഇന്ത്യൻ സാഹചര്യങ്ങൾക്ക് അനുയോജ്യമായതും അന്താരാഷ്ട്ര ഗുണനിലവാരമുള്ളതുമായ പുതിയ സങ്കരയിനങ്ങൾ വികസിപ്പിക്കാൻ ഇത് വഴി സാധിച്ചിട്ടുണ്ട്. വെറും ചോളമായി കയറ്റുമതി ചെയ്യുന്നതിന് പകരം, റെഡി-ടു-ഈറ്റ് (RTE), മൈക്രോവേവ് പോപ്‌കോൺ തുടങ്ങിയ മൂല്യവർധിത ഉൽപ്പന്നങ്ങളാക്കി മാറ്റുന്നത് വഴി കൂടുതൽ വിദേശനാണ്യം നേടാൻ സാധിക്കും.
നിലവിൽ ഒമ്പത് സംസ്ഥാനങ്ങളിലായി 17,500ലധികം കർഷകർ ഈ പദ്ധതിയുടെ ഭാഗമാണ്. ഏകദേശം 36,000 ഏക്കറിലധികം സ്ഥലത്ത് ഇപ്പോൾ പോപ്‌കോൺ ചോളം കൃഷി ചെയ്യുന്നുണ്ട്. കരാർ കൃഷി, ശാസ്ത്രീയമായ കൃഷിരീതികൾ, വിപണന സഹായം എന്നിവയിലൂടെ കർഷകർക്ക് സ്ഥിരമായ വരുമാനം ഉറപ്പാക്കാൻ സാധിക്കുന്നുണ്ട്. ഇത് ഇന്ത്യയെ ഒരു ആഗോള പോപ്‌കോൺ ഹബ്ബാക്കി മാറ്റുന്നതിൽ നിർണ്ണായകമാണ് എന്ന് റിപ്പോർട്ടുകൾ സൂചിപ്പിക്കുന്നു.