ദുബൈ വിനോദസഞ്ചാര മേഖലക്ക്​ തിരിച്ചടിയായി ഇന്ത്യയുടെ നോട്ട്​ പിൻവലിക്കൽ

ദുബൈ:  2020 ആകു​േമ്പാഴെക്കും 20 മില്യൺ വിനോദ സഞ്ചാരികളെന്ന ദുബൈയുടെ ലക്ഷ്യത്തിന്​ തിരിച്ചടിയായി ഇന്ത്യയിൽ നിന്നുള്ള വിനോദസഞ്ചാരികളുടെ എണ്ണത്തിൽ കുറവ്​. നോട്ട്​ പിൻവലിക്കലടക്കമുള്ള തീരുമാനങ്ങളാണ്​ ഇന്ത്യൻ സഞ്ചാരികൾ കുറയുന്നതിന്​ കാരണം. തിരിച്ചടി മറികടക്കാൻ മറ്റ്​ രാജ്യങ്ങി​ളിലെ സഞ്ചാരികളെ ആകർഷിക്കുന്നതിനുള്ള നടപടികൾ ആരംഭിച്ചതായി ദുബൈ വിനോദസഞ്ചാര കോർപ്പറേഷൻ സി.ഇ.ഒ ​ ഇസാം കാസിം ദ ഹിന്ദുവിന്​ നൽകിയ അഭിമുഖത്തിൽ പറഞ്ഞു.  

സൗദി അറേബ്യയി​ലെ സമ്പദ്​വ്യവസ്ഥയിലുണ്ടായ പ്രശ്​നങ്ങളും  ദുബൈയിലെ വിനോദസഞ്ചാര രംഗത്തിന്​ തിരിച്ചടിയുണ്ടാക്കിയതായി അദ്ദേഹം പറഞ്ഞു. ദുബൈയിലേക്ക്​ ഏറ്റവും കൂടുതൽ വിനോദ സഞ്ചാരികൾ എത്തുന്നത്​ ഇന്ത്യയിൽ നിന്നും സൗദി അറേബ്യയിൽ നിന്നുമാണ്​. 2016ൽ ഇന്ത്യയിൽ നിന്നുള്ള വിനോദ സഞ്ചാരികളുടെ എണ്ണത്തിൽ ആദ്യഘട്ടത്തിൽ വർധന രേഖപ്പെടുത്തിയെങ്കിലും വർഷവസാനം ഉണ്ടായ നോട്ട്​ പിൻവലിക്കൽ മൂലം സഞ്ചാരികളുടെ എണ്ണം കുറയുകയായിരുന്നുവെന്നും അദ്ദേഹം പറഞ്ഞു.

കഴിഞ്ഞ വർഷം ചൈനീസ്​ സഞ്ചാരികളുടെ എണ്ണത്തിൽ വർധന രേഖപ്പെടുത്തുന്നതായും കാസിം ചൂണ്ടിക്കാട്ടി. 5.4 ലക്ഷം സഞ്ചാരികളാണ്​ ചൈനയിൽ നിന്ന്​ എത്തിയത്​. മുൻ വർഷം ഇത്​ 4.5 ലക്ഷം മാത്രമായിരുന്നു. അതുപോലെ തന്നെ റഷ്യൻ സഞ്ചാരികളും കൂടുതലായി ദുബൈയിലേക്ക്​ എത്താൻ തുടങ്ങിയിട്ടുണ്ടെന്നും അദ്ദേഹം പറഞ്ഞു. ഇവർക്കായി  മികച്ച സൗകര്യങ്ങൾ ഒരുക്കാനാണ്​ ദുബൈ വിനോദസഞ്ചാര വകുപ്പ്​ ലക്ഷ്യമിടുന്നത്​. യാത്രികർക്ക്​ കുറഞ്ഞ ചിലവിൽ താമസ സൗകര്യമൊരുക്കുന്നതിനായി  കൂടുതൽ ത്രീ സ്​റ്റാർ, ഫോർ സ്​റ്റാർ ഹോട്ടലുകൾ തുടങ്ങുമെന്ന്​ കാസിം അറിയിച്ചു.