പ്ലാൻ ബി ഇല്ല; വിരമിക്കാൻ അനുവദിക്കണമെന്ന്​ എയർ ഇന്ത്യ പൈലറ്റുമാർ

ന്യൂഡൽഹി: എയർ ഇന്ത്യയുടെ സ്വകാര്യവൽക്കരണം സംബന്ധിച്ച്​ ആശങ്കകൾ നില നിൽക്കുന്നതിനിടെ ശമ്പള കുടിശ്ശിക തന്നു തീർക്കണമെന്ന്​ ആവശ്യപ്പെട്ട്​ പൈലറ്റുമാർ വ്യോമയാനമന്ത്രിക്ക്​ കത്തയച്ചു. മുടങ്ങി കിടക്കുന്ന ശമ്പളം സമയബന്ധിതമായി നൽകണമെന്ന​​ും നോട്ടീസ്​ പിരീഡില്ലാതെ വിരമിക്കാൻ അനുവദിക്കണമെന്നുമാണ്​ പൈലറ്റുമാരുടെ പ്രധാന ആവശ്യം.

മാർച്ച്​ 31 2020ന്​ മുമ്പ്​ എയർ ഇന്ത്യയുടെ സ്വകാര്യവൽക്കരണം നടന്നില്ലെങ്കിൽ അടച്ചുപൂട്ടുമെന്ന അങ്ങയുടെ പ്രസ്​താവന ആശങ്കപ്പെടുത്തുന്നതാണ്​. സ്വകാര്യവൽക്കരണമല്ലാതെയൊരു പ്ലാൻ ബി കമ്പനിക്ക്​ ഇല്ലാത്തിടത്തോളം ശമ്പളകുടിശ്ശിക തന്നു തീർത്ത്​ നോട്ടീസില്ലാതെ വിരമിക്കാൻ അനുവദിക്കണമെന്ന്​ പൈലറ്റുമാർ വ്യോമയാനമന്ത്രി എച്ച്​.പുരിക്ക്​ അയച്ച കത്തിൽ ചൂണ്ടിക്കാട്ടുന്നു.

അടച്ചുപൂട്ടിയ ഇന്ത്യയിലെ മറ്റ്​ 21 വിമാന കമ്പനികളിലെ ജീവനക്കാരുടെ വിധി ​ഞങ്ങൾക്ക്​ വരണമെന്ന് ആഗ്രഹിക്കുന്നില്ല. ശമ്പളം മുടങ്ങിയത്​ മൂലം ജീവനക്കാരുടെ വായ്​പ തിരിച്ചടവ്​ ഉൾപ്പടെ മുടങ്ങി. പലരും രാജിക്കത്ത്​ നൽകി നോട്ടീസ്​ പിരീഡിലാണ്​ ഉള്ളതെന്നും പൈലറ്റുമാർ കത്തിൽ വ്യക്​തമാക്കുന്നു.