100 ബില്യൺ ഡോളർ ക്ലബിൽ ഒടുവിൽ വാരൻ ബഫറ്റും

വാഷിങ്​ടൺ: ലോകത്തെ അതിസമ്പന്നരുടെ പട്ടികയിൽ പതിറ്റാണ്ടുകളായി മുൻനിരയിൽ നിലയുറപ്പിച്ചിട്ടും 100 ബില്യൺ ഡോളർ ആസ്​തി തൊടാതെനിന്ന വാരൻ ബഫറ്റ്​ ഒടുവിൽ ശരിക്കും മുതലാളിയായി. നിക്ഷേപ സ്​ഥാപനമായ ബെർക്​ഷയർ ഹാതവേയുടെ ചെയർമാനായ 90 കാരൻ ഏറെ വൈകിയാണ്​ 100 ബില്യൺ ഡോളർ ആസ്​തി തൊടുന്നത്​​. 100.4 ബില്യൺ ഡോളറാണ്​ ബുധനാഴ്​ച അദ്ദേഹത്തിന്‍റെ ആസ്​തി മൂല്യം. ജെഫ്​ ബിസോസ്​, ഇലോൺ മസ്​ക്​, ബിൽ ഗേറ്റ്​സ്​ തുടങ്ങിയവരാണ്​ 100 ബില്യൺ ഡോളർ ആസ്​തിയുള്ള മറ്റുള്ളവർ.

ചരിത്രത്തിലെ ഏറ്റവും വിജയിച്ച നിക്ഷേപകരിലൊരാളായി വാഴ്​ത്തപ്പെടുന്ന ബഫറ്റ്​ തന്‍റെ സ്വത്തിന്‍റെ വലിയ പങ്ക്​ ദാനം നൽകിയും പ്രശസ്​തനാണ്​. പതിറ്റാണ്ടുകളായി അതിസമ്പന്നരുടെ പട്ടികയിൽ ഏറിയും കുറഞ്ഞും ഏറ്റവും മുൻനിരയിലുണ്ട്​. പക്ഷേ, ആസ്​തി 100 ബില്യൺ ഡോളർ ഇതുവരെയും എത്തിയിരുന്നില്ല. ഇതാണ്​ ഒടുവിൽ പിന്നിട്ടത്​.

2006നു ശേഷം ഇതുവരെ മാത്രം 3700 കോടി ഡോളർ ബഫറ്റ്​ ദാനം ചെയ്​തതായാണ്​ കണക്ക്​. സമ്പന്നരി​ൽ ജീവകാരുണ്യം പ്രോൽസാഹിപ്പിക്കാനായി രൂപം നൽകിയ 'ഗിവിങ്​ ​െപ്ലജ്​' എന്ന സംഘടനയുടെ സഹ സ്​ഥാപകൻ കൂടിയാണ്​. ആമസോൺ സ്​ഥാപകൻ ജെഫ്​ ബിസോസിന്‍റെ മുൻ പത്​നി മക്കൻസി സ്​കോട്ട്​ ഇതിന്‍റെ ഭാഗമായി കഴിഞ്ഞ വർഷം നാലു മാസത്തിനിടെ 400 കോടി ഡോളർ ആസ്​തിയിലേറെയും ദാനം ചെയ്​തിരുന്നു.

600 കോടി ആസ്​തിയു​ള്ള ബെർക്​ഷയർ ഹാതവേ കമ്പനിയുടെ ആറിലൊന്നിന്‍റെ ഉടമയാണ്​ ബഫറ്റ്​. ഇൗ വർഷം മാത്രം കമ്പനിയുടെ ഓഹരി മൂല്യം 15 ശതമാനം കൂടിയിരുന്നു- അതായത്​, ഒരു ഓഹരിക്ക്​ നാലു ലക്ഷം ഡോളറിനു മുകളിൽ. കമ്പനിയിലെ ഓഹരികൾ കുറച്ച്​ നേരത്തെ മറ്റു കമ്പനികളിലേക്ക്​ തിരിഞ്ഞ ബഫറ്റ്​ ഈ വർഷം തിരിച്ച്​ ബർക്​ഷെയർ ഓഹരികൾ തന്നെ കൂട്ടമായി വാങ്ങി കൂട്ടിയിരുന്നു. ഇതാണ്​ കമ്പനി ഓഹരി മൂല്യം കുത്തനെ കൂട്ടിയത്​. ബുധനാഴ്ച മാത്രം 190 കോടി ഡോളറാണ്​ ബഫറ്റിന്‍റെ ആസ്​തി മൂല്യത്തിലുണ്ടായ വർധന.

ടെക്​നോളജി ഭീമന്മാരായ ആപ്​ൾ ഉൾപെടെ മുൻനിര കമ്പനികളിലാണ്​ ബെർക്​ഷയർ ഹാതവേയുടെ ഓഹരി നിക്ഷേപം.

1965ൽ ബഫറ്റ്​ ഏറ്റെടുക്കുംമുമ്പ്​ തകർച്ചക്കരികെയുള്ള ടെക്​സ്​റ്റൈൽ കമ്പനിയായിരുന്നു ബെർക്​ഷയർ ഹാതവേ. നിലവിൽ 90ലേറെ വ്യവസായങ്ങൾ കമ്പനിക്കു കീഴിലുണ്ട്​.

കഴിഞ്ഞ ഒറ്റ വർഷത്തിനിടെ മാത്രം 80 ലക്ഷത്തിലേറെ അമേരിക്കക്കാർ പുതിയതായി ദാരിദ്ര്യത്തിലേക്ക്​ വീണതായി അടുത്തിടെ റിപ്പോർട്ടുകൾ പുറത്തുവന്നിരുന്നു.