രണ്ടാം സ്​ഥാനക്കാരേക്കാൾ ഇരട്ടി സമ്പത്ത്​; ഏഷ്യയിലെ സമ്പന്നരായി വീണ്ടും അംബാനി കുടുംബം

ന്യൂഡൽഹി: ഏഷ്യയിലെ അതിസമ്പന്ന കുടുംബങ്ങളുടെ പട്ടികയിൽ ഒന്നാം സ്​ഥാനം അരക്കിട്ടുറപ്പിച്ച്​ ​അംബാനി കുടുംബം. 76 ബില്യൺ ഡോളർ (55,84,59,78,00,000 രൂപ) ആസ്​തിയുള്ള അംബാനി കുടുംബമാണ്​ ബ്ലൂംബർഗ്​ ബില്യണയർ ഇൻഡക്​സിൻെറ ഏഷ്യയിലെ 20 അതിസമ്പന്ന കുടുംബങ്ങളുടെ പട്ടികയിൽ ഒന്നാമതെത്തിയത്​.

ഏഷ്യയിലെ ധനികരായ 20 കുടുംബങ്ങളുടെ ആകെ സമ്പത്തായ 463 ബില്യൺ ഡോളറിൻെറ 17 ശതമാനവും അംബാനി കുടുംബത്തി​ൻെറ സംഭാവനയാണ്​​.

പട്ടികയിൽ രണ്ടാം സ്​ഥാനക്കാരായ ഹോങ്​കോങ്ങിലെ ക്വോക്​ കുടുംബത്തിനേക്കാൾ രണ്ടിരട്ടി ധനവാൻമാരാണ്​ അംബാനി കുടുംബം. മൂന്നാം സ്​ഥാനക്കാരായ ദക്ഷിണ കൊറിയയിലെ ലീ കുടുംബത്തേക്കാൾ (സാംസങ്​ ഉടമകൾ) മൂന്നിരട്ടിയിലധികം ആസ്തിയും അംബാനിക്കുണ്ട്​.

കോവിഡ്​ മഹാമാരിക്കാലത്ത്​ അംബാനിയുടെ സമ്പത്തിൽ വൻ വർധനയാണുണ്ടായത്​. ഏവരും കോവിഡ്​ മഹാമാരിയോട്​ പൊരുതുന്ന വേളയിലും മുകേഷ്​ അംബാനിയുടെ ജിയോയിൽ വമ്പൻമാർ നിക്ഷേപമിറക്കിക്കൊണ്ടിരുന്നു. ഫേസ്​ബുക്ക്​, ഗൂഗിൾ, കെ.കെ.ആർ, ടി.പി.ജി, സിൽവർലേക്ക്​ എന്നീ വൻകിട കമ്പനികൾക്ക്​ ഓഹരി വിറ്റ്​ 20.2 ബില്യൺ ഡോളറാണ്​ കോവിഡ്​ കാലത്ത്​ അംബാനി സമാഹരിച്ചത്​.

ഇതോടൊപ്പം തന്നെ റിലയൻസ്​ റീ​ട്ടെയിലിൻെറ 10.09 ശതമാനം ഓഹരികൾ വിറ്റ്​ 47,000 കോടി രൂപയും സമാഹരിച്ചു. റീ​ട്ടെയിൽ മേഖലയിലെ ഏറ്റവും വലിയ ഇടപാടുകളിലൊന്നായ ഇതിനായി രണ്ട്​ മാസമെടുത്തു​.ഓയിൽ ആൻഡ്​ ഗ്യാസ്​ ബിസിനസിൽ മാത്രമാണ്​ അംബാനിയുടെ​ വരുമാനത്തിൽ ഇടിവ്​ നേരിട്ടത്​.

റിലയൻസ്​ ഇൻഡസ്​ട്രീസ്​ ഓഹരി വിപണിയിൽ മുന്നേറ്റമുണ്ടാക്കിയതിലൂടെ 16 ബില്യൺ ഡോളറിൻെറ അധിക വരുമാനം ഉണ്ടാവുകയും ഇതിലൂടെ മറ്റ്​ കുടുംബങ്ങളുമായ അന്തരം വലിയ രീതിയിൽ കൂടുകയുമായിരുന്നു.

സഹോദരൻ അനിൽ അംബാനി ശതകോടീശ്വര പട്ടികയിൽ നിന്നും പുറത്തായ സാഹചര്യത്തിലാണ്​ അംബാനി കുടുംബത്തിൻെറ വളർച്ചയെന്നതും ശ്രദ്ധേയം.